3c Verhouding tussen de stammen

• Latijn
• Middelbare school
• vwo
• Leerjaar 5

Verhouding tussen de stammen 

De Bello Gallico VI, 23

Civitatibus maxima laus est, quam latissime circum se vastatis finibus solitudines habere.

Hoc proprium virtutis existimant, expulsos agris finitimos cedere,

neque quemquam prope se audere consistere.

Simul hoc se fore tutiores arbitrantur, repentinae incursionis timore sublato.

Cum bellum civitas aut inlatum defendit aut infert,

magistratus qui ei bello praesint ut vitae necisque
habeant potestatem, deliguntur.

In pace nullus est communis magistratus,

sed principes regionum atque pagorum inter suos ius dicunt controversiasque minuunt.

Latrocinia nullam habent infamiam, quae extra fines cuiusque civitatis fiunt,

atque ea iuventutis exercendae ac desidiae minuendae causa fieri praedicant.

Atque ubi quis ex principibus in concilio dixit se ducem fore,

qui sequi velint, profiteantur,

consurgunt ii, qui et causam et
hominem probant,

suumque auxilium pollicentur atque a multitudine conlaudantur;

qui ex his secuti non sunt,

in desertorum ac proditorum numero ducuntur,

omniumque his rerum postea fides derogatur.

Hospitem violare fas non putant; .

qui quacumque de causa ad eos venerunt, ab iniuria prohibent,

sanctosque habent, hisque omnium domus patent victusque communicatur.